INNTAKSREGLEMENT FOR HJELLVIK MONTESSORISKULE

§ 1: INNTAKSREGLEMENT

Inntak av elevar ved Hjellvik Montessoriskule skal skje etter dei til ei kvar tid gjeldande reglane i privatskolelova og det inntaksreglementet som er fastsett av styret.

§ 2: INNTAK AV ELEVAR

§ 2-1: ELEVINNTAK

Hjellvik Montessoriskule tek imot søknader om skuleplass på 1.–7. trinn. Skulen har heile landet som inntaksområde og er open for alle som fyller vilkåra for inntak i offentleg grunnskule.

Viss skulen har fleire søkjarar enn elevplassar, skal elevinntaket skje etter følgjande prioritering:

1.              Elevar som har sysken på skulen vert prioriterte.

2.              Elevar som bur innanfor gamle Hjellvik skulekrins vert prioriterte.

3.              Elevar som skal byrja på 1. trinn vert prioriterte.

4.              Søknader som kjem inn før søknadsfristen vert prioriterte.

5.              Ved elles lik prioritet vert søknader prioriterte i den rekkjefølgja dei vert mottekne.

Viss skulen har fleire søkjarar enn elevplassar, skal det opprettast ei prioritert venteliste i samsvar med § 6.

§ 2-2: SØKNADSFRIST

Søknadsfristen er 1. februar.

Etter hovudinntaket fastset skulen rammene for organiseringa av komande skuleår. Dette omfattar:

•          undervisningsgrupper

•          romfordeling til undervisning

•          tilstrekkeleg undervisningspersonell

Det vert samstundes vurdert om det framleis er faktisk ledig kapasitet for inntak innanfor desse rammene og kapasitetsgrensene i § 2-4. Søknader som kjem inn etter søknadsfristen og før inntaksstoppen, kan takast inn dersom det er faktisk ledig kapasitet på det aktuelle årstrinnet eller i den aktuelle undervisningsgruppa, og inntaket kan gjennomførast innanfor dei planlagde rammene for undervisningsgrupper, romfordeling, personell og forsvarleg pedagogisk drift. Dersom fleire søkjarar konkurrerer om den ledige kapasiteten, skal prioriteringsreglane i § 2-1 nyttast.

§ 2-3: INNTAKSSTOPP

Skulen har inntaksstopp 25. september. Etter inntaksstoppen kan skulen berre ta inn elevar dersom søkjaren flyttar til gamle Hjellvik skulekrins og skulen har faktisk ledig kapasitet innanfor gjeldande organisering og kapasitetsgrensene i § 2-4.

§ 2-4: ELEVKAPASITET

Skulen har ein samla maksimal elevkapasitet på 70 elevar.  Skulen kan årleg fastsetje kapasitetsgrenser pr årstrinn/grupper.

§ 3: KUNNGJERING AV INNTAK AV ELEVAR

Kvart år i januar skal inntak til komande skuleår kunngjerast på skulen sine nettsider og gjennom andre eigna informasjonskanalar som styret eller rektor finn tenlege. Kunngjeringa skal innehalde nødvendige opplysningar om søknadsfristen, korleis ein søker, eventuell kapasitetsgrenser og kvar dette inntaksreglementet er publisert. 

§ 4: INNTAKSNEMND

Styret kan velje ei inntaksnemnd som skal førebu og gjere innstilling til inntak etter dette reglementet. Rektor gjer endeleg vedtak om inntak.

§ 5: HANDSAMING OG KUNNGJERING AV INNTAK

Rektor gjer vedtak om inntak og melder vedtaket til søkjaren sine føresette. Melding om hovudinntaket skal normalt sendast innan seks veker etter at søknadsfristen har gått ut. Rektor melder frå til eleven sin heimkommune når føresette har takka ja til tilbod om skuleplass. Søkjarar som ikkje får plass, skal få skriftleg melding om vedtaket. Meldinga skal innehalde informasjon om retten til å krevje grunngjeving for vedtaket, retten til å klage, klagefristen, klageinstansen og framgangsmåten for klage. Vedtak om inntak er enkeltvedtak etter privatskolelova § 3-1 og skal handsamast i samsvar med sakshandsamingsreglane i forvaltningslova.

§ 6: PRIORITERT VENTELISTE

Som ledd i inntakshandsaminga skal skulen utarbeide ei prioritert venteliste i samsvar med inntakskriteria i § 2-1. Ventelista skal leggjast til grunn dersom ein eller fleire som har fått plass, ikkje tek imot plassen, eller dersom det på annan måte vert ledig kapasitet før inntaksstoppen. Ventelista gjeld fram til inntaksstoppen 25. september. Etter denne datoen kan det berre gjerast inntak etter § 2-3.

§ 7: ENDRING AV INNTAKSREGLEMENT

Dette inntaksreglementet kan til ei kvar tid endrast av styret innanfor rammene av gjeldande reglar i privatskolelova og skulen sine vedtekter.

Vedtatt av styret ved Hjellvik Montessoriskule 31.08.26. Gjeld frå 01.09.26.